هادا ايميل صيفتو للتلامذ اللي معانا ف “منين نبدا “
الصيمانة اللي فاتت … و عجبهوم مزيان…
( بغيتي حتى انت(ي) تكون منهوم دخل سميتك و الايميل ديالك لتحت … و غادي يجيك هاد الخير من الاوليين)
—————————————————————————
غادي نقول ليك واحد السر : فوذنيك دابا واحد السيد (ة) تيقول
شتي أنت (ي) مكتستحقش تنجح فالباك.
واخا تخدم و تدمر … مغديش تجيب … لأنك مكتستحقش النجاح..
علاش و كيفاش ؟
….
بعض المرات كتنساهوم … و بعض المرات كيبانو ليك غير تخربيق
ولكن … شي طريقة عندها أكثر من 70 عام و خدامة
راه عمرها أكبر من عمر الواليد(ة) ديالك يمكن ؟
متحكرهاش…
متحكرش التأكيدات الذاتية Positive affirmations
أعيد …متحكرش التأكيدات الذاتية
هاد الصيمانة وقعت ليا واحد اللعبة
شي 3 شهور و أنا كنعاني منها من الضغط و العياء
وأستعملتها و خدامة مزيان ..
و عاود أكدات الفعالية ديالها
التأكيدات الذاتية كلمات و جمل كنكولها لراسي
كنكولها بصوت مرتفع كنسمعوا..
جمل بسيطة و نتائج كبيرة
كتكلم مباشرة مع العقل اللاواعي … ومحدك كتعاودها
و هي كتلصق و كيبدا يتيقها العقل الباطن..
و كتولي عندو عادية
و كيولي كيعاونك بلا متعرف و بلا متحس …
Loi d’attraction من بين المظاهر ديالها
متحكرهاش …
البرهان ؟
الاغلبية ديال التلامذ كيستعملوا هاد التقنية و لكن بطريقة سلبية
تيكول معا راسو “الماط صعيب”
داك الاستاذ محملنيش
الوطني هاد العام مبدل و غادي يخرج عليا
و فعلا خدامة ليهوم … راه مخلوعين و بدون ثقة فالنفس
أنت (ي) كون ذكي (ة) استعملها لصالحك
لكن رد البال لهاد الحوايج :
1- قبل متنعس سد عليك بيت فالسكات و عاود التأكيدات ديالك على الاقل 10 مرات
2- التأكيدات خاصها اسباب باش يقبلها العقل… راجع و اسهر و دير تمرين العديان و AWT …
3- الاسباب خاصها تكون صحيحة و déja وقعت ليك
4- أول مرة غادي تستعملها ؟ … خاصك تطبقها لمدة شهر … ايه 30 يوم
و النتائج مبهرة
مثال لتأكيدات جيدة :
أنا كنستحق نجيب 18/20 فالماط فالامتحان الجاي لأن .. كنبغي من أعماق أعماق قلبي ننجح بمونسين مقادة
أنا كنستحق نجيب 18/20 فالماط فالامتحان الجاي لأن .. كنخدم كول نهار 3 سوايع قبل ما نعس
أنا كنستحق نجيب 18/20 فالماط فالامتحان الجاي لأن .. والدي راضيين عليا و كيعاونوني و يدفعوني باش ما قدوا
أنا كنستحق نجيب 15/20 فالفيزيك فالامتحان الجاي لأنني كنفيق مع 5 الصباح و نبدا نخدم التمارين
أنا كنستحق نجيب 18/20 فالماط فالامتحان الجاي لأنني كندير الخير مع صحباتي كنعاون اللي وحلت فشي
حاجة.. كنتهلى فالمسكين .. كنهز القفة لشي مراة كبيرة … كنعاون شي بصير باش يقطع الشانطي
أنا كنستحق نجيب 19/20 فالماط فالامتحان الجاي لأنني عبد من عباد الله اللي عزاز عليه …
و كيما كيبغي العباد الاخرين كيبغيني حتى أنا و كيعاونني حتى انا
لدوك اللي شاكيين ...حل عقلك وجرب … حتى حد ما غادي يمضغ ليك 😉
جمل بسيطة و نتائج كبيرة
شوف هاد الفيديو .. فين تقدر توصل بيها : Amaaaazing …
الله يسَّر
بالتوفيق
( بغيتي حتى انت(ي) توصلك هاد الطرق دخل سميتك و الايميل ديالك لتحت هنا … و غادي يجيك هاد الخير من الاوليين)
مشطون مزيان هاد اليامات و كنجاوب على الايميلات معطل désolé
و لأنه صعيب نعاون كول واحد بوحدو … داكشي علاش درت باب الباك … ياك ؟
