أسئلتكم و أجوبتي -نهاية الصيف و بداية السنة🔥


دورة أخرى للإجابة على أسئلتكم التي تصلني


تذكير لمن التحق بنا جديدا:


—-


انا لا اجيب عن الاسئلة 

التي تحتوي فقط على جوج كلمات

و اعطيني نصيحة استاذ


طلب النصيحة هو فن ايضا

لم نتعلمه في المدرسة


لكن احترم هذه الاربعة اركان

اذا سألت احدا كيفما كان 

عمك، جاركم، مفتش، مدير الاكاديمية

و ستكون بخير..



1-اشكر المجيب على اي شيء قدمه لك و استفدت منه

(لا بأس ان تقول … 

شكرا السي احمد على طريقة الغلسوقي الفشكوني

اللي درتي فالفيديو … 

جربتها و نقصت 5 كيلو فالميزان فجوج صيمانات)



2-قدم نفسك اولا : الاسم، السن، باك حر أم متمدرس في الثانوي، مدينتك،

ضروفك عائلية او صحية ان كانت ستوضح المشكلة


3-اشرح مشكلتك اليوم بالتفصيل الممل … 

لا تقل سأطول على الاستاذ / الحارس العام

الشيطان في التفاصيل الصغيرة… 

اشرح و وضح 

فصل


4-ما هي الطرق التي جربت سابقا لحل مشكلك بدون نتيجة؟

هذه مهمة جدالانها تخبر الخبير ان السائل شخص جدي 

و سيطبق الحل الذي ستعطيه


(لا تنسى من يجيبك يقتطع جزءا من حياتهمجانايقتطع وقتا مهما جدا

سيقطعه كما لو يقطع اصبعا صغيرا من يده اليمنى 

ليجيبك عن مشكلتك 

و يختصر عليك مجهودا و وقتا  او ينقص عنك مالا )


لنبدأ 


—-


1-السلام عليكم استاذ جمال . معاك خالد من اليوسفية  احد التلاميذ   باب الباب  فوج 2023  أنا مسلك   علوم فيزيائية إنشاءالله  . امعرفتش بالضبط منين نبدا بالضبط باش نكون  خدام موازاة مع نفس التلامذة باب الباك . مبغيتش نكون فايت التلامذة او معطل عليهم  . بالاضافة عندي مشكلة كيفاش نوفق بين الخدمة الدراسة لان  الخدمة لتنخدم خدمةshift في شركة

اسبوع   تنخدم صباح .اسبوع  عشية اسبوع الليل.   معرفتش طريقة لنقدر نحفظ فيها حيث كل اسبوع تتقلب عندي برنامج معرفتش كيفاش نراجع مع هذا تقلب الاسبوعي في الخدمة . شكرا بزاف  راني انضمت مجموعة باب الباك  2023  .  



مرحبا بك خالد في فوج 2023. 

أولا يجب أن تفهم أن الباك الحر تجربة فردية

تعتمد فيها 99% على نفسك.  

لماذا؟ لأن ظروفك مختلفة كليا على كل المترشحين الاخرين

كيفما كانوا. و هذا يعني أن كل مترشح حر مختلف


و برنامجه للدراسة مختلف ايضا.  


بما أنك تعمل ثلاثة shift فيجب أن يكون لك برنامج للمراجعة بTsunami 

مختلف لكل اسبوع من الثلاثة


اذا حددنا مثلا مدة اربع ساعات يوميا للمراجعة

يجب أن تضعها إما قبل ساعات العمل 

أو اذا كنت تحس بالعياء، تضعها بعد أن ترجع من العمل

و تنام ثمانية ساعات للراحة.  


هكذا فعلها الكثيرون السنة الفائتة معنا من la zone franche في طنجة مثلا


تذكر!   

صعوبة عملك و هذا البرنامج المتغير 

هو الدافع الاساسي و القوي لتأخد باك حر خالد.  


على كل حال، في بداية شتنبر سنلتقي في اللايفات الاسبوعية 

و نناقش الموضوع بتفصيل.  





2-عافاك استاد بغيت نسولك انا سبقلى دفعت باك حر 2018 و لكن للاسف كان عندي استدراكية و بحكم العمل مقدرتش نمشي ندوزها دبا بغيت ندفع ل 2023 بغيت نعرف كيفاش ندير حيت العام الفايت بغيت ندفع و مقبلونيش حيت غيبت



مرحبا كريمة

دائما أحذر من هذا الغلط 

اذا لم تريدي حضور الامتحان الوطني أو الاستدراكية

يجب يجب يجب أن تعللي غيابك بشهادة طبية في الحين


و الا ستأخذين عقوبة سنتين من الحرمان من الباك الحر


المهم، بالنسبة لك مرت هذه السنتان،

اذن يمكنك أن تدفعي باك حر في موسم 2023 بدون مشاكل

اتبعي فقط الدليل المفصل هنا 


https://baclibre.ma/bac-libre-باكحرالمغرب




3-سلام دكتور انا باغية نقدم على باك ليبر وعندي تخوف كبير حيت انقطعت على دراسة في 2001 كنت دايرة آداب عصرية سنة أولى ثانوي  تزوجت عندي 2 وليدات أنا مطلقة دابة و خدامة ولكن عندي تخوف كبيييير منقدرش نجيب الباك الحر 


أوك سلمى

ايلا بقيتي فنفس الوضع دابا خدامة و كتصرفي على وليداتك

واش غادي يقدك المصروف من دابا خمس سنين

من دابا عشر سنين


فاش الوليدات باغيين مدرسة ديال الفلوس، و الحوايج غاليين

و الطبيب و الكراء وووو


واش هاد الخدمة كافية لهاد الشي؟!


هل انت راضية عن نفسك بهذا المستوى الدراسي؟!

هل تقبلين انتقادات الاخرين و نظراتهم الدونية؟!


هل الفشل مثلا مرة واحدة أو مرتين أسوء من الشعور التي تحسين به الان؟!



اذا كان الجواب بنعم

اوك. ابتعدي عن الباك الحر و تابعي حياتك بصفة عادية


اذا كان الجواب لا. أنت تستحقين أفضل!!

الامر كيستاهل المحاولة.  

توكلي على الله





4-أنا غادي نشتراك معك إنشاء في بداية شهر أنا غادي ندير باك ليبر في العلوم الفيزيائية الهذف ديالي هو ندخل نقرا في ensa ولكن أنا غادي تكون عندي 25  عام في 2023 ولكن ملي سوالت على ensa قالو ليا خاصك ما تفوتش 22 عام واش هد شي بصح ؟؟


مرحبا بيك سمير معنا

من تجربة ديالي، عدد من التلامذ دخلوا ل ensa على 28 عام،

على 35، على 38عامغير العام اللي فات


انتبه لمن تأخذ منه معلوماتك. يقدر معارفش.  


بل اكثر من ذلك انتبه حتى من المعلومات في المواقع الالكترونية للمدارس، منذ اسابيع تلميذة تهاتفني انها قرأت في موقع لكلية الطب انهم لا يقبلون اكثر من 23 سنة

نعم في موقع مباراة الطب و تفقسات مزيان و فقدات الامل

و في نفس السنة 2022، دخل سليم اللي القصة ديالو التحت لكلية الطب على سن 28 عام!!




على العموم، تقدر تدير لعيبة زوينة… 

اذهب الى اقرب ensa حداك

و انتظر خروج التلاميذ


انتبه جيدا لأي تلميذ في الثلاثينات و كيبان كبير و لحية 

و اذهب عنده و تشاور معه!!

غادي يعطيك المعقول




5-السلام استاد متشرفة انني عرفت الموقع ديالك بغيت نسولك فقط انا حلمي لقيتو فالاقتصاد وبغيت ندير باك حر اقتصاد ولكن فنفس الوقت ندير لفاك واش نقدر نوفق بيناتهوم ولا مستحيل مع العلم باغا ندير نفس الشعبة فباك حر ولفاك وشكرا 




الجواب: مستحيل ايلا ممعولاش تبدلي.  

مستحيل ايلا بغيتي تخدمي الباك الحر 

بنفس الطرق القديمة اللي جربتيها قبل و منفعاتش


معنا في باب الباك تلاميذ يقومون بها كل سنة

يعملون في شركات (مثل خالد أعلاه) ثمانية ساعات 

و يحققون احلامهم بباك حر


ممكن بالطبع. توكلي على الله!



6-شكرا دكتور مغاري علما اني كنت دوبلت تالتسعة واش زعما كتحسب تلث سنين ولا غير سنتين او سمحليا على كثرة اسئلة

و هل فعلا سيكون باك بالعرببة لتلاميذ مكررين?


كتحسب من أول سنة دوبلتي.  

الباك حر بالعربية على حسب الاكاديميات. شي وحدين كيقبلوا عربية و شي وحدين لا 

كيجبروك تدوزوا بالفرنسية.  

الجواب الدقيق غادي يبان فاش يتحل التسجيل الباك حر فشهر 11






7-صباح الخيرات دكتور جمال خويا أنا  سني 31 مطلقة  متوقفة عن الدراسية من سنة 2007 أولى باكالوريا شعبة آداب والعلوم الإنسانية  عندي طموح وقوة داخلية توازي الكون بأسره

قررت هذه السنة ندوز الباك ليبر شعبة svt عندي عراقيل في الفيزياء والرياضيات ولكن بإذن الله سأتغلب عليها . المهم أنا حاليا كنحس باللي خاصني نخدم بجهد مضاعف فضطريت نحبس العمل ديالي في مجال الحلاقة والتجميل و عندي رغبة باش نشارك معك في باب الباك

أولا انطلاقا من الخبرة ديالك عطيني شي نصيحة  تقدر تفيدني وثانية أنا مكرهتش لو تكرم علي ودير ليا تخفيض في دورة  باب الباك مع العلم اني تخليت على العمل ديالي أقصد اني فعلا للأمانة محتاجة تخفيض لو أمكن ولو ما استطعتيش نصيحة لو سمحت معارفاش بالظبط منين نبدأ الترتيب ديال الدروس و و و الخ وشكرا جزيلا دكتور جمال بالتوفيق




مرحبا سعاد

نصيحتي لك هي ما قلت اعلاه لسلمى

الزمن يتغير و الظروف تتغير بسرعة

كل من لم يطور نفسه، سيجد حاله في أسفل السلم.  


باب الباك عليها تخفيض جيد الان مع الدخول المدرسي و هي قيمتها 7760 درهم،

يعني تخفيض اكثر من خمسة الاف درهم!!!

 

و يمكنك أن تستفيدي منه هنا https://baclibre.ma/pdadrct/ 


ثانيا، نحن نبدأ من البداية. اولا مادة الرياضيات 

و نبدأ بحساب النهايات

ثم عموميات حول الدوال 

ثم المتتاليات 

ثم دالة اللوغاريتم


كما هو مشروح في موقع baclibre.ma


من جهة اخرى نحن سنلتقي في اللايفات المباشرة لأتعرف على ظروفك بالتفصيل

و اعطيك برنامج خاص بك




8-شكرا لك أستاذ على جميع المعلومات والنصائح والشكر موصول أيضا لرشيد على الملخصات الجيدة 

أنا علي من مدينة تازة ,عاد تعرفت بالصدفة مؤخرا على الموقع ديال باكليبر أستاذي جات فالوقت لي كنفكر نعاود نقرى الباك الحر أنا خديت الباك في 2016   العمر ديالي حاليا 22 سنة كانت السنة الأولى كارثية ضاعت وذلك لسوء التوجيه وأنت على علم بهذا وكتكون في سن صغير وكتصنت لكلشي 

من بعد أستاذي دخلاتلي فكرة ديال الهجرة والدراسة في ألمانيا وبالنسبة ليا مرة ثانية كانت فكرة خاطئة تسجلت في الجامعة وبديت نقرى اللغة الألمانية 

خداتلي بزاف ديال الوقت وبزاف ديال الفلوس 

ماقدرتش نوفق بين الجامعة واللغة بحكم كنت كنخدم باش نخلص المصاريف ديال الدراسة 



مهم أستاذ أنا الأن واحل حلم الهجرة بدا كيتبخر 

بسبب الضروف لي كيعيش العالم كامل

 ومن جهة أخرى ضاعت 4 سنوات في الجامعة بدون نتيجة


 راني في موقف صعيب لدرجة 

مابقاش كيجيني نعاس وليت مريض بالأرق 

بكثرة التفكير في مستقبلي لي كنشوف فيه كيضيع.


المهم أستاذ من هاذ الكلام كامل وأستسمح منك على الإطالة وكنتمنى تقرى الرسالة ديالي كنفكر ندير باك حر علوم رياضية 

لكن في الأول كنضن خاصني نخدم على الجانب النفسي كيفاش نقدر أستاذ نصفي الدهن ديالي من جميع الأفكار ونركز على الباك كتبان 

هي الفرصة لي بقات باش نصحح المسار ديال حياتي أنت عارف أستاذ الخدمة مع الناس وتمارة ليس حل باش تعيش حياة مناسبة 

زيادة أستاذ هناك ضغط كبير من طرف العائلة بحكم أنا الكبير في الخوت والعائلة في مجال قروي واخا كنفكر نكلس مع الأب ديالي ونشرح ليه الضروف وكيفاش واقع لكن ميفهمكش .

أستسمح منك بزاااف وشكرا لك و على مجهوداتك المبدولة وتحياتي الخالصة لك أستاذ 




مرحبا محمد

هذه قصة الرجال. انت تعمل و تعيل أسرة


و هذه رجولة تستحق التنويه


نعم يمكن أنك ارتكبت أخطاءا 

لكن ما زال هناك وقت.  


و لمعلوماتك، التحق بنا في باب الباك مؤخرا 

تلميذ حر من ألمانيا

يعمل تقنيا في التبريد بدون باك و له مرتب جيد


لكنه كما قالمرضيتش نعيش غير هكاك هنا” 


ألمانيا تطلب دبلومات صحيحة

و تطلب تلامذة نبهاء متفوقين لهم نقط عالية


حصل على النقط العالية و سوف تأخذك ألمانيا بالاحضان.  


نعم هدفك الاول أن تصلح الجانب النفسي

و هذا ما نبدؤوه هنا في هذه الايميلات كل يوم

تابعها بترتيب


ثم يمكنك أن تدخل معنا الى باب الباك لتكتشف الطرق المتطورة الاخرى


اللهم يسير



بالتوفيق



==

تحت هذا الايميل نسخة من قصة سليم مع كلية الطب التي ارسلت لك الاسبوع الماضي


نكمل لعبتنا الجميلة معا 


و نحاول معا الاحساس بالمشاعر التي احسها سليم و هو يعيد مباراة الطب ثماني مرات حتى نجح فيها هذه السنة



اوك البارحة/السنة الثالثة، قام بباك حر للمرة الثانية بنقطة 14

و اجتاز مباراة الطب للمرة الخامسة و فشل فيها



هنا سليم يحس باحساس لأول مرة


لأول مرة لم يحس بالاستياء


انه يحس بأنه أدى واجبه و راجع دروسه

انه لم يحس بأي خوف اثناء المباراة


لا كان واثقا من نفسه

كتب الاجابات 

لم يعرف بعضها


لكنه لم يحس بأي تأنيب للضمير


يحس براحة كبيرة انه يؤدي واجبه

و يعمل ما في وسعه


بل انه بدأ يسمع صوتا غريبا في رأسه:

ربما الله لا يريد لك النجاح هذه السنة بل يؤجله للسنة المقبلة من اجل حكمة لا تعرفها!


نعم صوت غريب لم يكن ليصدقه قبل سنتين

لكنه الان يؤمن به اشد الايمان!


انها مجرد لعبة!


ثم رجع الى دروسه يستعد للمرة السابعة !!


غدا نتابع معركته معا.!



===



دكتور دخلت الطب بعد محاولات ثماني سنوات✊👇



ايميل متميز اليوم و قصة حقيقية من مدينة بوعرفة يبصم عليها سليم. تلميذ معنا يتابع هذه الايميلات كما تتابعها انت


اقرئها بقلبك كما قرأتها و حسيت بتبوريشة من عزمه و اصراره 

ثم تمعن في حكمة الله معه خطوة بخطوة

===


مرحبا استاذنا الغالي، انا سليم من مدينة وجدة، العمر 28 سنة، 

خديت الباكلوريا حرة سنة 2018, كنت مجتهد فالاعدادي ماكاين غير الاولمبياد الرياضيات والمراتب الاولى فالاعدادية 


وكان آخر أفضل معدل خديتو هو 18,5 فمعدل الثالثة إعدادي، 

لكنني تراجعت كثيرا!


لكي أحصل في الجدع المشترك على معدل 11, كانت الصدمة 


والاساتذة بقاو ينصحوني نتبع الشعبة الآدبية لأنني حصلت علي نقط مرتقعة فيها في حين المواد العلمية نقط كارثية، 


كنت نقول ان الخطأ ماشي ديالي وأن الاساتذك ديال المواد العلمية هم السبب لأنهم كايتعاملو مع تلاميذ الدعم،


اما انا لي حالتي فقيرة ومانقدرش ندير دروس الدعم كنت كانرفع صبعي غير باش نجاوب ولكن ماتعطاليش الكلمة، 


وفعلا فبلاصة مانكتفي بالحقد على الاستاذ حقدت على المادة ايضا، 

وهاكا بقيت حتى خديت الباك بمعدل 12 سنة 2012, نقطة ممتازة فالجهوي ونقط كارثية فالمواد العلمية ( الماط :4, الفزياء:9), 

خديت الباك 


وتفاجئت انني فجهة والحلم ديالي لي هو الطب ومساعدة الناس فجهة أخرى، 

قريت سنة فالكلية شعبة الحياة والأرض، وهنا فين غادي نتلاقا واحد الاستاذ لي غادي يلعب دور لي مادارهش الموجه وفقط عبر الفايسبوك، 


كان أستاذ الجيولوجيا ذا كاريزما كما انه كان لطيفا ولا يرد من اراد منه المشورة، عطانا الفايسبوك الشخصي ديالو وشرحتلو الوضعية ديالي، 


فقال لي جملة لي غاتولي الهدف ديالي من بعد، قلتلو الميولات ديالي والمجالات لي عاجبيني، الطب ونفرح المريض والعائلة ديالو 

ولكن فنفس الوقت يعجبني نشرح لشي صديق شي درس وفغالب الاحيان كانتوفق فهادشي بسهولة، 


فقال ليانت خصك تبدل هادشي لي راك داير سير دير الطب ومن بعدها ترجع prof فكلية الطب إن شاء الله، هاكا غادير جوج حوايج يعجبوك، 


فعلا حطيت هاد الهدف فراسي، دفعت باك حر، وفنفس الوقت دفعت معهد الممرضين، 

قلت هاكا نكون فالمجال لي نبغي ك plan B ومن ناحية أخرى نوجد الباك باش نجيب معدل الانتقاء ، 


تقبلت ممرض متعدد التخصصات وقريتها وفنفس الوقت كنت نوجد الباك، 


ماكانش هادشي ساهل ، لأن البرنامج الدراسي كان عامر للأسف، ولكن جبت 14 فالمعهد و 14 فالباك ( وجزاكم الله خيرا على الموقع ديالكم وvideo لي كتقدموه بالمجان استفدت منهم كثيرا وقدرت نحيد العقدة ديال المواد العلمية ونجيب فيهم فوق 10) 


من بعد هادشي دفعت كلية الطب وغاتكون اول مرة ندوز الكونكور، 

ماوجدتش مزيان وفشلت للأسف، كنت خارج من المباراة 

و كنقول انا ماغاديش ننجح خصني نفكر كيفاش غانخدم عليخا العام جاي من دابا، 


هكذا بقيت كل مرة نفوت 

وكل مرة تقدام الباكلوريا ديالي نعاود باك حر، 


تخرجت وخدمت ممرض فمدينة بوعرفة 

وكنت نعاود الكونكور ديال الطب كل مرة ونفشل 


ولكن كانكون فرحان وكانضحك 

ونقول يمكن ربي مابغانيش ننجح هاد العام ولكن باغيني ننجح فواحد العام لي تكون الظروف أحسن، 


واحد النهار وكيف العادة هبط واحد الشاب مريض لقاعة العمليات 

والحمد لله كانخدم الجانب النفسي والانساني بدرجة اولى واخا بعض الانتقادات، 

انا كانحاول نحسب كل مريض على انه فرد من افراد العائلة، هبطت مع هاداك المريض لقاعة العمليات عاونتو يحيد الملابس ديالو، 


رجعت للمصلحة ديالي نشوف المرضى شويا رجعت عندو لقيتو بدا يتبنج، 

شجعتو وقلتلو ماغاتحس بوالو، وانا غادي تلقاني نستناك تخرج 

وموجدلك الدوا كامل باش ماتحس بحتى وجع،


حل عينيه بشويا وقالي جملة غادي نشوفها بحال الفلم من بعد مانعرف اني نجحت فمباراة الطب، قالي : خويا سليم، يا رب تولي طبيب!


جاتني لبكيا وقلبي بقا يرجف، وقلت كيفاش هاد الشاب عرف شنو فقلبي، 

كيدار عرف ان هذا هو الهدف ديالي لي حاولت معاه 7 ديال المرات، 


يا رب استجب دعاءه وننجح هاد المرة، فاتت الايام فوت الباكلوريا الخامسة ونجحت فيها ومن بعدها المباراة للمرة الثامنة، 


بصراحة خدمت علوم الحياة والارض بسهولة، الكمياد والفزياء نص نص، ولكن الرياضيات مابقاليش الوقت،


كان باقيا 15  دقيقة، حاولت نجاوب على 5 أسئلة الاسهل لتفادي النقطة  الإقصائية، وخرجت، جا نهار النتائج 


وكيف العادة كانقول نجحت مزيان مانجحتش نعاود العام جاي،


قطرة قطرة يحمل الواد، الحمد لله نجحت وبان اللون الأخضر فاش فتحت الحساب ديالي، بعد ان كنت مليت من داك اللون الرمادي، تقبلت !!


مامتيقش ان هذه العقدة صافي ماغاتبقاش،


أخيرا غانقرا الطب واخا تمنيت نتفرغله 100 فالمئة باش نعطي گاع داكشي لي عندي


لي بغيت نقول للأصدقاء دياولنا الا كنت تبغي شي حاجة دير المستحيل باش توصلها لأن نهار تخدمها غاترتاح وماتحتاجش تحفيز ولا، 


لأنك كاتخدم داكشي لي كاتبغي، وديما نقول فراسي ( أريد أن أفعل كل ما يمكن أن أفعل


الله عطانا قدرات خصنا نوظفوها لصالح المجتمع، يمكن واحد الشخص عطاه ربي شي قدرة غير هو بوحدو فالمنطقة، إذن الناس محتاجينو بزاف،


حصو يعرف القدرات لي عطاه الله، يصقلها مزيان ثم يوظفها لصالح بلادو او منطقته


وكل ماكان الهدف ديالنا نبيل غانمشيوا بعيد وبلا مانحسو نقدرو نحققو اهداف أخرى ايضا لي تقر ماتكونش نبيلة مئة بالمئة بحال المال، المنزل،. سيارة… 


ولكن أفضل ان يكون الهدف الأسمى هو في المقدمة، شكرا جزيلا استاد على التحفيز الدائم ديالكم لينا، 


كاندكر هذه السنة فاش جيت من مادة اللغة العربية وانا فاشل بعض الشئ وكانجي للدار فين ساكن بوحدي فبوعرفة، 

وخصني عاد نطيب الاكل وندير بزاف لحوايج عاد نقدر نراجع،


ولقيت رسالتكم حول اهمية تلخيص المواد، عجبتني الفكرة بزاف وطبقتها، لخصت الاجتماعيات لي كانت خالعاني ديك الليلة لأن الوقت مابقاش، 


ودرت تقريبا ليلة بيضاء ولكن قدرت نحفظ داك التلخيص خصوصا اني كتبتو بيدي وبطريقتي، 


وجبت 17 فالمادة واخا عطيتها وقت قليل


جزاكم الله خيرا أستادنا الغالي، أمثالكم هم من يجب ان يكونو قدوة للشباب، 

نفتخر بكم وبمغربيتكم سيدي، أعتذر على الإطالة، حفظكم الله 



اخيرا، بالنسبة ليا المعدل لي جبت فالباكلوريا الأخيرة 14, شعبة علوم الحياة والارض خيار فرنسي، 


الصعوبة لي واجهت هي المزاوجة بين العمل والتحضير للباكلوريا والمباراة بالإضافة الى اني أعيش بعيدا عن الأسرة 

كانو تابعيني حوليج الدار والمطبخ


الأن ملي نجحت فالمباراة كايجيني الخبر الثاني المفرح إني نجحت فالانتقال إلى مدينتي (وجدة


الحمد لله

هاكا نقدر نخدم ونقرا، عاد عرفت الحكمة من ان الله كان يأجلي الحلم ديالي،


واخا مانقدرش نعرف الحكمة كاملين لأن الله وحده يعرف، فالحمد لله جوج فرحات خطرة وحدة، 


واخا نقدر نتزير من بعد مع السطاجات وندير démission من التمريض 


ولكن على الأقل السنوات الاولى غادي نحاول نجمع واحد القدر مالي لي يريحني من بعد، جزاكم الله خيرا يا أستاذ


===


انتهى كلام سليم


دروس و عبر بالكيلو في هذا الايميل

لذلك نصيحتي لك هي ان تسجله في هاتفك و تقرأه بين المرة و الاخرى


اقرأ بين السطور 


فهذه ليست حجاية. هذه قصة شاب 28 سنة صارع الباك حر و صارع كلية الطب لمدة ثمانية سنوات متتالية 

ثم غلبهما عندما تأكد الكون و تأكدت الحياة أنه لن يتنازل على حلمه


======

للتلاميذ المتمدرسين أو المترشحين الاحرار 

الذين يحضرون الباك 

بالعربية أو 2023 BIOF

هذه دورة باب الباك لتحقق 19/20 في الرياضيات و الفيزياء 

مهما كان مستواك السابق و مهما نسيت الدروس و الخصاءص

بأذكى طرق متوفرة و أقل جهد ممكن

https://baclibre.ma/pdvdrct/

الدكتور جمال المغاري

About the author

Jamal Doc. Lamghari

Leave a Comment

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

متابعة يومية معالدكتور المغاري؟
+ +